డాక్టర్. కేశవులు భాషవత్తిని. ఎండి. సైకియాట్రీ,
చైర్మన్ : తెలంగాణ మేధావుల సంఘం.
85010 61659.
అమెరికా ఇమ్మిగ్రేషన్ విధానాలు ఎప్పుడూ ప్రపంచవ్యాప్తంగా చర్చకు వస్తుంటాయి. ముఖ్యంగా హెచ్1బీ వీసా (H-1B Visa) విషయానికి వస్తే భారతదేశం కంటే ఎక్కువగా ప్రభావితమయ్యే దేశం మరొకటి ఉండదు. ఎందుకంటే, ఈ వీసా ద్వారా అమెరికాకు వెళ్ళే లబ్ధిదారుల్లో 71% భారతీయులే. ముఖ్యంగా తెలుగు రాష్ట్రాలైన ఆంధ్రప్రదేశ్, తెలంగాణ రాష్ట్రాల నుండి మాత్రమే సుమారు 35 వేల మంది ఐటీ ఇంజనీర్లు ప్రతి సంవత్సరం ఈ వీసాల కోసం అమెరికా తలుపులు తడుతున్నారు.
ఇప్పుడు అమెరికా ప్రభుత్వం హెచ్1బీ వీసా ఫీజును లక్ష డాలర్లకు పెంచిన విషయం (మొత్తం ప్యాకేజీ, లీగల్ ఫీజులు, ఫైలింగ్ ఫీజులు కలిపి) ఒక పెద్ద ప్రకంపన కలిగించింది. ఈ మార్పు కారణంగా ఎవరు ఎక్కువ నష్టపోతారు? ఎవరు లాభపడతారు? అమెరికా కంపెనీలకా? భారతీయ ఐటీ ప్రొఫెషనల్స్కా? లేక మొత్తం అమెరికా ఆర్థిక వ్యవస్థకా? .
హెచ్1బీ వీసా చరిత్ర
అమెరికా 1990లో ఇమ్మిగ్రేషన్ యాక్ట్ ద్వారా హెచ్1బీ వీసా ప్రోగ్రామ్ను ప్రారంభించింది. దీని ప్రధాన ఉద్దేశ్యం – అమెరికాలో లభ్యమవుతున్న అత్యున్నత నైపుణ్యపు ఉద్యోగాలకు అమెరికన్లకు లేని workforce ను ఇతర దేశాల నుండి తీసుకురావడం. ముఖ్యంగా సాఫ్ట్‌వేర్, ఇంజినీరింగ్, మెడిసిన్, ఫైనాన్స్ రంగాల్లో నిపుణులు కొరతగా ఉన్న సమయంలో, హెచ్1బీ ప్రోగ్రామ్ ఒక పెద్ద ఉపశమనం అయ్యింది. ప్రారంభంలో వార్షికంగా 65,000 వీసాలు మాత్రమే ఇచ్చేవారు. 2000 దశకంలో డిమాండ్ పెరగడంతో 20,000 అదనపు వీసాలు అమెరికన్ యూనివర్సిటీల నుండి పట్టా పొందినవారికి కేటాయించారు. ఈ విధంగా మొత్తం 85,000 వీసాలు ప్రతి సంవత్సరం లాటరీ పద్ధతిలో ఇస్తూ వచ్చారు. భారతీయ ఐటీ పరిశ్రమ 1990ల చివరలో బూమ్ అవ్వడంతో, హెచ్1బీ ప్రోగ్రామ్ లో 60% పైగా భారతీయులు ఉండటం సహజమైంది.
ఆర్థిక వ్యవస్థలో హెచ్1బీ పాత్ర…
అమెరికా ఐటీ ఇండస్ట్రీలో పది లక్షల మందికి పైగా భారతీయులు పనిచేస్తున్నారు.వీరి ద్వారా అమెరికా కంపెనీలు వేల కోట్ల డాలర్ల విలువైన ప్రాజెక్టులను పూర్తి చేస్తున్నాయి.H1B వీసాధారులు సాధారణంగా సగటు జీతం $70,000–$120,000 వరకు సంపాదిస్తారు.అమెరికాలో వీరితో పాటు 30 లక్షల స్థానిక ఉద్యోగాలు కూడా indirectగా లభిస్తున్నాయి. అమెరికా టెక్ పరిశ్రమలో భారతీయులు లేకుంటే, ప్రాజెక్టులు ఆలస్యమవుతాయి. ప్రోడక్టివిటీ తగ్గుతుంది. గ్లోబల్ పోటీదారులైన చైనా, యూరప్ కు ప్రాధాన్యం పెరుగుతుంది.భారతీయుల ఆధిపత్యం – తెలుగు రాష్ట్రాల ప్రాధాన్యం, భారతదేశంలో హెచ్1బీ వీసా కోసం అత్యధికంగా దరఖాస్తులు వేసేవారు –ఆంధ్రప్రదేశ్ , తెలంగాణ, తమిళనాడు, కర్ణాటక, వీటిలో ప్రత్యేకంగా తెలుగు రాష్ట్రాలు మరియు హైదరాబాద్ ఐటీ పరిశ్రమలో ప్రతి రెండో కుటుంబం అమెరికా కలతో చదువులు, ఖర్చులు పెడుతోంది. కుటుంబాలు ఇప్పటికే కోచింగ్ ఫీజులు, GRE, TOEFL, అప్లికేషన్ ఫీజులు, వీసా ఖర్చులు కోసం లక్షల రూపాయలు ఖర్చు చేస్తున్నారు. ఇప్పుడు కొత్త రూల్స్ వల్ల ఈ పెట్టుబడులు వృథా అయ్యే ప్రమాదం ,ఇంజినీరింగ్ కాలేజీల అధిక సంఖ్య. ఐటీ ట్రైనింగ్ ఇన్స్టిట్యూట్లు. అమెరికాలో ఇప్పటికే ఉన్న టెలుగు NRI కమ్యూనిటీ (కలవడం, సపోర్ట్ సిస్టమ్) ఉంది.
అసలు ఉద్దేశ్యం….
అమెరికా ప్రభుత్వం రూ.9 లక్షల కోట్ల వరకు వచ్చే దశాబ్దంలో ఈ వీసా ఫీజుల ద్వారా సంపాదించాలని లక్ష్యం పెట్టుకుంది.ఒక్కో కంపెనీకి వీసా ఫైలింగ్, లీగల్, వీసా ప్రాసెసింగ్, ట్రావెల్ కలిపి $100,000 (సుమారు రూ.85 లక్షలు) ఖర్చు అవుతుంది.ఈ ఫీజులు సగటు జీతం కంటే ఎక్కువ కావడం కంపెనీలకు పెద్ద సవాలే.అమెరికన్ ఉద్యోగులను ప్రోత్సహించడం.భారతీయుల ఆధిపత్యాన్ని తగ్గించడం.ఇమ్మిగ్రేషన్ పై కఠిన నియంత్రణ. ప్రభుత్వ ఆదాయాన్ని పెంచుకోవడం.
వాళ్ళకే బారి దెబ్బ ….
ప్రతి సంవత్సరం 1.25 లక్షల మంది భారతీయ విద్యార్థులు అమెరికా యూనివర్సిటీల్లో అడ్మిషన్ తీసుకుంటారు. వీరిలో ఎక్కువమంది STEM కోర్సులు చదివి OPT (Optional Practical Training) ద్వారా అమెరికాలో పని చేసే అవకాశాన్ని ఆశిస్తారు. OPT పూర్తయిన వెంటనే H1B వీసా పొందడం సాధారణ మార్గం , కానీ, H1B ఇప్పుడు కంపెనీలకు భారీ బరువుగా మారితే, వారు కొత్తగా పట్టభద్రులైన విద్యార్థులను స్పాన్సర్ చేయడానికి వెనకడుగు వేస్తారు. అంటే విద్యార్థులు $50,000–$70,000 ఫీజులు పెట్టి చదివినా, ఉద్యోగం దొరకకపోవచ్చు. దీంతో అమెరికాకు స్టూడెంట్ల వెళ్ళే ఉత్సాహం తగ్గిపోవచ్చు.
వారు MS లేదా PhD పూర్తిచేసి H1B వీసాకు అప్లై చేస్తారు.కానీ ఇప్పుడు వీసా ఫీజులు పెరగడంతో:చాలా మంది వెనక్కి తగ్గుతారు. కెనడా, ఆస్ట్రేలియా, యూరప్ వైపు వెళ్ళే అవకాశాలు ఎక్కువ.
అమెరికాకు లాభమా ?
కొత్త వీసా రుసుముల వల్ల అమెరికా ప్రభుత్వానికి తక్షణంగా ₹9 లక్షల కోట్ల వరకు అదనపు ఆదాయం వస్తుంది. అమెరికా కంపెనీలు స్థానిక అమెరికన్లకు ఉద్యోగ అవకాశాలు కల్పించడానికి కొంత వరకు అవకాశం ఉంటుంది. సాధారణంగా అమెరికా IT కంపెనీ ఒక H1B ఉద్యోగిని స్పాన్సర్ చేస్తే ఖర్చు, లీగల్ & అప్రూవల్ ఫీజులు: $5,000–$10,000, ప్రాసెసింగ్ & లాయర్ ఫీజులు: $5,000–$7,000, మొత్తం,సుమారు $15,000 వరకు ఇప్పుడీ కొత్త రూల్ ప్రకారం $100,000 అదనంగా చెల్లించాల్సి వస్తుంది. అంటే, ఒక ఉద్యోగి మీద ఖర్చు $1.15 లక్షలు అవుతుంది. అదే ఉద్యోగి సగటు జీతం $120,000 అయితే, కంపెనీకి అది “ఎకానమికల్‌గా ప్రాఫిటబుల్” కాదు. కాబట్టి వారు కొత్తగా H1B అప్లై చేయడం తగ్గిస్తారు.అమెరికాలో భారతీయుల సంఖ్య తగ్గితే ఇండో–US సంబంధాలు కూడా ప్రభావితమవుతాయి.భారతదేశం ఇతర దేశాలతో (కెనడా, యూరప్) కొత్తగా టెక్ ఒప్పందాలు కుదుర్చుకునే అవకాశం ఉంది.అమెరికా మాత్రం తాత్కాలికంగా ఆదాయం పొందినా, long-termలో టెక్ ప్రాజెక్టులలో నష్టపోయే అవకాశం ఉంది.ఒక కంపెనీ 100 మంది ఉద్యోగులకు H1B వీసాలు స్పాన్సర్ చేస్తే, మొత్తం ఖర్చు = 100 × $100,000 = $10 మిలియన్ (రూ.85 కోట్లు). ఈ స్థాయి ఖర్చు చిన్న మరియు మధ్యస్థాయి IT కంపెనీలకు అసాధ్యం. గూగుల్, మైక్రోసాఫ్ట్, అమెజాన్ వంటి పెద్ద కంపెనీలే కొంతవరకు భరించగలవు
భారత్ కి నష్టమా?
భారతీయ ఐటీ ఇంజనీర్లకు ఉపాధి అవకాశాలు తగ్గిపోతాయి.కొత్తగా అమెరికా వెళ్ళాలనుకునే విద్యార్థులు భారీ అప్పుల్లో పడతారు.వీసా పొడిగింపులు కూడా ఖరీదైనవిగా మారుతాయి. గ్రీన్‌కార్డు ప్రాసెస్ ఆలస్యం అవుతుంది.H1B కఠినతరం కావడంతో అమెరికా మార్కెట్‌లో Indian presence తగ్గుతుంది. ఫలితంగా బ్రెయిన్ డ్రైన్ తగ్గుతుంది, కానీ అదే సమయంలో ఇండియాలో ఉద్యోగాల డిమాండ్ పెరుగుతుంది.అయితే, ఇండియా తగినంత హై-పేయింగ్ ఉద్యోగాలు ఇవ్వలేకపోతే నిరుద్యోగం పెరుగుతుంది. ఇప్పటికే అమెరికాలో ఉన్నవారు తిరిగి రావాల్సిన పరిస్థితి.తిరిగి వచ్చినా ఇక్కడ తగినంత జీతం, ఉద్యోగ వాతావరణం లేక ఇబ్బందులు. కానీ దీని వలన భారతదేశానికి నైపుణ్యమైన workforce తిరిగి రావడం ఒక అవకాశమే.
టాలెంట్ కే పట్టం….
ఈ కొత్త నిబంధనల వల్ల సాధారణంగా సగటు స్థాయి ఉద్యోగులు H1B ద్వారా అమెరికా చేరడం దాదాపు అసాధ్యం అవుతుంది.అత్యంత ప్రతిభావంతులైన, టాప్-క్లాస్ ప్రోగ్రామర్లు, AI/ML నిపుణులు, సైబర్ సెక్యూరిటీ స్పెషలిస్టులు, హెల్త్‌కేర్ రీసెర్చర్లు మాత్రమే అవకాశం పొందుతారు. ఈ మార్పుతో “మాస్ మైగ్రేషన్” నుండి “ఎలైట్ మైగ్రేషన్” దిశగా ఉంటుంది, ఐటి ప్రొఫెషనల్స్ అమెరికా వెళ్ళలేకపోతే, వారు భారతీయ మార్కెట్లోనే కొత్త స్టార్టప్స్, R&D సెంటర్లు, కన్సల్టింగ్ ఫర్మ్స్ మొదలుపెట్టే అవకాశం ఉంది.
హైదరాబాదు, బెంగళూరు, పుణే, గుర్గావ్ లాంటి నగరాలు కొత్త సిలికాన్ వ్యాలీలా మారే అవకాశం ఉంది.
“బ్రెయిన్ డ్రెయిన్” తగ్గి, “బ్రెయిన్ గెయిన్” పెరిగే అవకాశం ఉంటుంది.
భవిష్యత్తు దిశ….
అత్యంత ప్రతిభావంతులైన సాఫ్ట్‌వేర్ ఇంజినీర్లు, డేటా సైంటిస్టులు, AI ఇంజినీర్లు అమెరికా రాకపోతే, గూగుల్, మైక్రోసాఫ్ట్, అమెజాన్, మెటా వంటి కంపెనీలకు టాలెంట్ కొరత వస్తుంది. సిలికాన్ వ్యాలీ వృద్ధి భారతీయ టాలెంట్ వల్లే సాధ్యమైంది. వారిని కోల్పోతే అమెరికా గ్లోబల్ ఇన్నోవేషన్ లీడర్‌గా ఉండడం కష్టం అవుతుంది. దీర్ఘకాలంలో అమెరికా ఈ రుసుములను శాశ్వతం చేస్తే, కెనడా, ఆస్ట్రేలియా, యుకే, జర్మనీ వంటి దేశాలకు భారతీయుల ప్రవాసం పెరుగుతుంది. H1B కాకుండా, “రిమోట్ వర్క్” భవిష్యత్తు అవుతుంది. అమెరికా కంపెనీలు భారతదేశంలో నుంచే ఉద్యోగులను రిమోట్‌గా నియమించుకోవచ్చు. దీని వల్ల హైదరాబాద్, బెంగళూరు, చెన్నై, పుణేలో కొత్త వర్క్ హబ్‌లు ఏర్పడతాయి. ఈ వీసా రుసుము తక్షణంగా అమెరికాకు లాభం తెచ్చిపెడుతున్నా, దీర్ఘకాలంలో ప్రతిభను కోల్పోయే ప్రమాదం ఉంది. భారతదేశానికి ఇది ఒక షాక్ అయినా, అదే సమయంలో ఒక అవకాశం కూడా. ప్రతిభావంతులైన యువత దేశంలోనే స్టార్టప్స్, ఇన్నోవేషన్స్ చేయడం వల్ల భారత్ “గ్లోబల్ టాలెంట్ హబ్”గా మారే అవకాశం ఉంది.
